مشاهد من حدوتة عجوزة

إضاءة
الوقت ,
بالونة حكاوي بتنفجر ...
جواك
ينزّ جلدك حقايق
تعرق أغاني بطعم حزنك ,
و إحساسك بالدخول
فـ التيه

مدخل
حترد بإيه
إذا أحلامك الموؤدة
سئُلت
ما دافعتش عنها ليه ؟
وليه ..
سلمت نفسك للوجع
و عملت من حزنك قصايد
رغم اقتناعك ..
بإن الشعر ما بيطرحش
بكرة ؟

كلاكيت
راجع بنص الذاكرة
و بنص حلم
واسع عليك توب البراءة
حلمك بيسقط
رغم ادعاءك ... الوصول
لسر أسرار التواصل
تجاعيد شذوذك
نحتت فـ وشك
مشوار قلق
لعيونك الكافرة
و معافرة ,
خطوة قدمك التايهة

فـ سكة دخلتها بنفسك ,
وروحك
اتشعلقت ع الباب
بقيت منسي
فـ أبعد ركن فـ ضلوعك
بتعّد فـ خطاوي الوقت
و الوقت أبطأ ,
من خطاوي المهزومين
سرسب الخوف جوة قلبك
فاكتشفت :
لحظة وصولك ,
لحظة بداية لموت ..,
بطئ

فلاش باك
قابلته
طفل عنيد
بيحاول يرسم نفسه ويخرج ,
من عبايات اللي محاصرينه
وبيحلم ..
يلقي لنفسه ,
وسط الزحمة مكان
كان ,
- وبكل شقاوة عمره –
بيشخبط علي جدران القهوة ,
ويطفي سيجارته فـ سرفيس الشاي
وبيعشق كاس الخمرة
والبنت اللي بتتكلم ..
فـ الجنس
كان .. مجنون
لكن جواه
طفل بيحبي

ستوب كادر
نهجت عينيك
و النهار لساه بعيد
و الشموع اللي فـ إيديك
حيجيلها لحظة و تنطفي
هل حتقدر تستمر ؟

هامش
لو ضاعت منك لحظة
ما تبكيش
خسارة تضيع لحظة كمان
زووم
بيعافر .. تاني
رغم ان إيديه مش طايلة
وسماه ,
عمّالة بتبعد أكتر
لكن .. بيعافر
يفتح توابيت أحلامه ,
وينفخ فيها ,
روحه الباقية
جايز ..
تتسحّب روحه لقلب الموت .. حياة

فينال
بسبورك .. قديم
محتاج تجدد .. دم ترحالك
أثناء غيابك
حاجات كتيرة اتغيرت
و عشان تواصل
مضطر إنك تنتزع ,
م الوجود .. تأشيرة تانية

هو إيه الزمن
حدوثة وبتروح
زي محنا بنروح
تبقى ذكرى ..
تحفر في الروح .
رائع زجلك صديقي كامل .
قلوبنا مع مصر الحبيبة .

بل حدوثة أصيلة لها جذور في الأعماق.. من خلالها تنصهر الآهات أجمل تراتيل لنا أن نستمتع بمعاودة قراءتها ...تقديري صديقي أحمد كامل

و أنتم في قلب مصر و المصريين أستاذ مصطفي

لكم سعدت بكلماتك التي تدل علي إدراكك و فهمك العميق لماهية العامية المصرية .. أشكرك أستاذ نجيب